ប្រជាពលរដ្ឋអំពាវនាវ៖ ទីតាំងល្បែងស៊ីសង អនឡាញណេត ជាច្រើនទីតាំងបើកលេងយ៉ាងសេរីនៅភូមិព្រៃទា ចោមចៅ៣ ព្រងើយកន្តើយចំពោះច្បាប់

ប្រជាពលរដ្ឋអំពាវនាវ៖ ទីតាំងល្បែងស៊ីសង អនឡាញណេត ជាច្រើនទីតាំងបើកលេងយ៉ាងសេរីនៅភូមិព្រៃទា ចោមចៅ៣ ព្រងើយកន្តើយចំពោះច្បាប់

ភ្នំពេញ៖ ស្របពេលដែលរាជរដ្ឋាភិបាលកម្ពុជា និងក្រសួងមហាផ្ទៃ កំពុងបន្តយុទ្ធនាការក្តៅគគុកក្នុងការបង្ក្រាបមជ្ឈមណ្ឌលឆបោកតាមប្រព័ន្ធបច្ចេកវិទ្យា (Online Scams) និងល្បែងស៊ីសងខុសច្បាប់ទូទាំងប្រទេស ស្រាប់តែលេចធ្លាយព័ត៌មានពីប្រជាពលរដ្ឋថា មានទីតាំងល្បែងស៊ីសងអនឡាញដ៏ធំមួយ កំពុងបើកដំណើរការយ៉ាងអាណាធិបតេយ្យ និងមិនកោតក្រែងញញើតសមត្ថកិច្ចមូលដ្ឋានឡើយ។

ភស្តុតាង និងសកម្មភាពនៅទីតាំងផ្ទាល់តាមប្រភពព័ត៌មានពីប្រជាពលរដ្ឋ និងអ្នកសារព័ត៌មានក្នុងស្រុកបានរាយការណ៍ថា ទីតាំងខុសច្បាប់នេះមានបង្កប់ល្បែងស៊ីសងជាច្រើនប្រភេទ រួមមាន ទូហ្គេមបាញ់ត្រី ការ៉ាត់ (Baccarat) និងការភ្នាល់បាល់អនឡាញ។

ទីតាំងស្ថិតនៅទល់មុខព្រលានយន្តហោះចាស់ ក្នុងភូមិព្រៃទា សង្កាត់ចោមចៅទី៣ខណ្ឌពោធិ៍សែនជ័យ រាជធានីភ្នំពេញ។

ទីតាំងត្រូវបានបិទបាំងដោយកញ្ចក់ខ្មៅជិតឈឹង បើកលេងទាំងយប់ទាំងថ្ងៃ និងមានកម្លាំងសន្តិសុខយាមកាមយ៉ាងតឹងរ៉ឹង ដើម្បីរារាំងការចូលពិនិត្យពីខាងក្រៅ។

ការបើកអាជីវកម្មខុសច្បាប់យ៉ាងបើកចំហបែបនេះ បានធ្វើឱ្យប្រជាពលរដ្ឋដាក់ការសង្ស័យ និងរិះគន់ចំៗថា តើអស់លោកមន្ត្រីអាជ្ញាធរក្នុងមូលដ្ឋានពិតជាមើលមិនឃើញ ឬមួយក៏ត្រូវ «ថ្នាំសណ្ដំ» និងមានផលប្រយោជន៍នៅពីក្រោយ ទើបបណ្តោយឱ្យល្បែងស៊ីសងបង្កការអសន្តិសុខដល់សង្គមបែបនេះ?អត្តសញ្ញាណមន្ត្រីពាក់ព័ន្ធដែលត្រូវទទួលខុសត្រូវដើម្បីធានាតម្លាភាព និងយោងតាមតួនាទីភារកិច្ចក្នុងការគ្រប់គ្រងសន្តិសុខសណ្តាប់ធ្នាប់ មន្ត្រីដឹកនាំក្នុងជួរអាជ្ញាធរខណ្ឌពោធិ៍សែនជ័យ និងសមត្ថកិច្ចជំនាញដែលប្រជាពលរដ្ឋកំពុងអំពាវនាវឱ្យចុះអន្តរាគមន៍ រួមមាន៖លោក សក់ ច័ន្ទកញ្ញារិទ្ធ – អភិបាល នៃគណៈអភិបាលខណ្ឌពោធិ៍សែនជ័យ (ប្រធានគណៈបញ្ជាការឯកភាពរដ្ឋបាលខណ្ឌ)។លោកវរសេនីយ៍ឯក ម៉ន វុធី – អធិការនគរបាលខណ្ឌពោធិ៍សែនជ័យ (ទទួលខុសត្រូវផ្ទាល់លើកម្លាំងសមត្ថកិច្ច និងបង្ក្រាបបទល្មើសព្រហ្មទណ្ឌ-ល្បែងស៊ីសងក្នុងខណ្ឌ)។

អាជ្ញាធររដ្ឋបាលសង្កាត់ចោមចៅទី៣ – មន្ត្រីប៉ុស្តិ៍នគរបាលរដ្ឋបាលសង្កាត់ និងចៅសង្កាត់ចោមចៅទី៣ដែលជាអ្នកក្តាប់ស្ថានការណ៍ផ្ទាល់នៅក្នុងមូលដ្ឋានភូមិព្រៃទា។ការអំពាវនាវសុំការបង្ក្រាបជាបន្ទាន់បច្ចុប្បន្ន ប្រជាពលរដ្ឋក្នុងមូលដ្ឋានកំពុងទទូចស្នើសុំយ៉ាងទទូចដល់ ឯកឧត្តម ឃួង ស្រេង អភិបាលរាជរដ្ឋាភិបាលភ្នំពេញ និង ឯកឧត្តមអគ្គស្នងការនគរបាលជាតិ ព្រមទាំងលោកអភិបាលខណ្ឌ និងលោកអធិការខណ្ឌពោធិ៍សែនជ័យ មេត្តាចាត់វិធានការក្តៅ បញ្ជូនកម្លាំងជំនាញចុះទៅបង្ក្រាប និងបិទទីតាំងល្បែងស៊ីសងអនឡាញនៅភូមិព្រៃទានេះជាបន្ទាន់ ដើម្បីទប់ស្កាត់អំពើចោរកម្ម និងរក្សាសុវត្ថិភាពជូនប្រជាពលរដ្ឋ ស្របតាមគោលនយោបាយភូមិ-សង្កាត់មានសុវត្ថិភាពរបស់រាជរដ្ឋាភិបាល។